Ikipe ya APR FC yamaze kumvikana uwahoze ari Umunyezamu wa Musanze FC, Muhawenayo Gad ndetse na Mugiraneza Frodouard ukina hagati mu ikipe ya Kiyovu Sports.
Amakuru dufite ahamya ko APR FC ifite gahunda yo kugura abakinnyi batatu b’Abanyarwanda ndetse ikaba yamaze kumvikana n’abakinnyi bane b’abanyamahanga barimo myugariro wo hagati, babiri bakina imbere ndetse n’undi uca ku ruhande.
Mu Banyarwanda 3 bumvikanye n’iyi kipe harimo aba babiri, Muhawenayo Gad ugiye gusimbura Ishimwe Pierre wahawe uburenganzira bwo kwishakira ikipe nubwo yari asigaranye umwaka umwe w’amasezerano muri iyi kipe ifite Igikombe cya Shampiyona.
APR FC ikaba kandi yanatandukanye na Ishimwe Christian ndetse na Omborenga Fitina bakinaga mu bwugarizi.
Mugiraneza Froduard, nawe ni undi mukinnyi wo hagati wakiniraga Kiyovu Sports, akaba afatwa nk’umusimbura wa Mugisha Bonheur wavuye muri iyi kipe mu mwaka wa shampiyona wabanje ariko kugeza ubu wari utarabona umusimbura.
APR FC iri gushakisha umutoza mushya, biteganyijwe ko azatangazwa mu ntangiriro z’icyumweru gitaha. Izatangira imyitozo tariki ya 17 Kamena ubwo abakinnyi bazaba bavuye mu Ikipe y’Igihugu ’Amavubi’ bazaba bageze i Kigali.
