Umugabo witwa Ibrahim Ogunrinde w’imyaka 46 usanzwe ukora akazi ko kubaga abifatanya n’ubuhinzi mu gihugu cya Nigeria, yashyikirijwe ubutabera nyuma yo gutera icyuma umumotari yashinjaga kujya mu rukundo n’umugore we.
Yateguye umugambi wo gutera icyuma uwitwa Daniel Kosu yashinjaga ko yigaruriye umugore we.
Ku wa Gatanu tariki 7 Kamena 2024, nibwo umuvugizi w’urwego rw’umutekano, Moruf Yusuf, yatanze itangazo ryemeza iby’aya makuru y’itabwa muri yombi rya Ogunrinde ukurikiranyweho gutera icyuma umumotari wari umutwaye.
Polisi yatangaje ko ku wa gatatu tariki 5 Kamena 2024 ni bwo Ibrahim Ogunrinde yateze moto yari itwawe na Daniel Kosu, icyo gihe bwari bugorobye amusaba kumugeza mu gace k’umujyi wa Olubo. Ubwo bahageraga yahise amutera icyuma.
Nk’uko tubikesha Naija News, uyu mugabo ubaga inyama akanahinga amaze gutera icyuma uwo bari bashyamiranye ngo yahise amwaka moto ye aracika.
Ubwo yabazwaga icyabimuteye, yemeye ko yashatse kwica umumotari ahamya ko uwo mumotari yacudikanyeho n’umugore we mu mezi abiri ashize mbere yo kugambirira kwihorera amuteye icyuma.
Amakuru avuga ko uyu mugabo ubaga inyama yateye icyuma umumotari mu ijosi, ndetse no ku kuboko amusiga avirirana, byongeyeho ahita anacikana moto y’uwo akomerekeje amuta wenyine.
Uyu mubazi yavuze ko yaterwaga imbaraga n’icyifuzo yari afite cyo kurimbura umumotari wari warigaruriye umugore we. Ubwo yamaraga kumutera icyuma yari yizeye ko yapfuye, mu gihe uyu mumotari yahise ajyanwa mu bitaro bya Federal Medical Centre biherereye Abeokuta aho akomeje kwitabwaho.
