Impuzamashyirahamwe y’umupira w’amaguru muri Afurika CAF, yahaye umugisha Stade Amahoro iheruka kuvugururwa, yemeza ko iri ku rwego rw’ama stade make kuri uyu mugabane afite ubushobozi bwo kwakira imikino mpuzamahanga yo ku cyiciro cya kane muri CAF kikaba icya mbere muri FIFA.
Ishyirahamwe ry’umupira w’amaguru ku isi FIFA, na CAF zishyira ama stade mu byiciro bitandukanye, aho icyiciro kiri ku rwego rwo hejuru muri CAF ari icya kane mu gihe icya FIFA ari icya mbere ari na cyo Stade Amahoro ibarizwamo.
Nyuma y’uko impuguke zivuye muri CAF zisuye Stade Amahoro mu mpera za Mata 2024, zasanze iyi stade iri ku rwego rwo hejuru rw’ama stade yo kuri uyu mugabane no ku isi yose, aho inujuje ibisabwa ngo ibe yakwakira umukino wanyuma w’igikombe cy’isi ndetse n’icy’Afurika, bivuze ko yanakwakira indi mikino yose ibaho mpuzamahanga.
Muri Gashyantare 2022 ni bwo stade Amahoro yatangiye kuvugururwa hakorwa imirimo y’ibanze, ariko ibikorwa nyir’izina bitangira muri Kanama uwo mwaka aho yubakwa na Sosiyete yo muri Turikiya yitwa Summa Rwanda JV ifatanyije n’izindi zo mu Rwanda zirimo Real Contractors.
Stade Amahoro ifite ubushobozi bwo kwakira ibirori by’ubwoko bwose ndetse abazajya baba bayirimo, bakaba bicaye neza, ahantu hatwikiriye.
Ndetse kandi ifite ubushobozi bwo kwakira abantu ibihumbi 45 bicaye neza. Hateganyijwemo ibyumba bizajya bikorerwamo n’abanyamakuru mu kazi kabo, bitandukanye n’aho baba bakorera hejuru muri stade mu gihe bari kureba umukino.
Amakipe azaba afite ahantu habiri hatandukanye yinjirira kuko aba agomba kwinjira adahuye. Ifite urwambariro rushobora kwakira amakipe ane icya rimwe, ni ukuvuga abiri agiye gukina n’andi ashobora gukina nyuma yaayo.
Kuri uyu wa Gatandatu tariki 15 Kamena 2024, nibwo umukino wa mbere uzahuza Rayon Sports na APR FC uzabera muri Stade Amahoro kuva yavugururwa.
