Umupolisi ufite ipeti rya CIP yarashe umucamanza mu rukiko maze nawe abaporisi bagenzi be bamurasa urufaya rw’amasasu

Umupolisi ufite ipeti rya ‘Chief Inspector of Police’ (CIP) wo muri Kenya, yarashe umucamanza mukuru Monica Kivuti wo mu rukiko rwa Makadara i Nairobi, nawe ahita araswa na bagenzi be ahita apfa nyuma gato yuko uwo mucamanza afashe icyemezo mu rubanza amakuru avuga ko umugore we aregwamo.

Bivugwa ko uwo mupolisi mukuru yarakajwe n’icyemezo cy’urukiko cyo kuburizamo gufungurwa by’agateganyo kw’umugore we nyuma yuko yari yarabuze.

BBC dukesha iyi nkuru ivuga ko uwo mupolisi mukuru, yitwa Kipchirchir Kipruto, yari asanzwe akuriye stasiyo ya polisi yo mu mujyi wa Londiani, mu burengerazuba bwa Kenya, yahise asohora imbunda arasa umucamanza, aramukomeretsa.

Abandi bapolisi bagenzi be bakuru bari bari mu rukiko bahise bamusubiza ako kanya, kuko umwe muri bo yahise arasa uwo mupolisi mukuru watangiye kurasa, aramwica.

Raporo ya Polisi ingaruka ku byabaye, igaragaza ko muri uko kurasana, abandi bapolisi bakuru batatu bakomeretse. Uwo mucamanza n’abapolisi bakuru bakomeretse barimo kuvurirwa mu bitaro.

Urwego rw’ubucamanza rwa Kenya rwavuze ko uwo mucamanza “yashatse kurekurwa by’agateganyo hatanzwe ingwate ku muntu ushinjwa utaritabye urukiko ndetse wari wananiwe gutanga ibisobanuro byumvikana ku kutitaba urukiko”.

Itangazo ry’urwo rwego rigira riti: “Ako kanya iki cyemezo kigitangazwa, umuntu yarashe umucamanza amukomeretsa mu mayunguyungu.”

Iryo tangazo ryavuze ko amakuru y’ibanze avuga ko “uwarashe ni umupolisi mukuru washakanye n’ucyekwa”. Polisi ya Kenya yavuze ko uwo mupolisi mukuru yari ari mu rukiko “ku mpamvu zitazwi”.

Polisi yavuze ko iperereza rikomeje kugira ngo hamenyekane icyateje uko kurasana imbere mu rukiko, byatumye Abanya-Kenya benshi bagwa mu kantu.

Urwego rw’ubucamanza rwavuze ko ruzavugurura ingamba z’umutekano ndetse rwijeje umutekano usesuye, abakozi bo mu bucamanza n’abandi bagana inkiko.

Umwanditsi mukuru w’ubucamanza Winfridah Mokaya yagize ati: “Nk’umuryango w’ubucamanza, twifurije mugenzi wacu gukira vuba. Tunihanganishije umuryango w’umupolisi mukuru wapfiriye muri ibi byabaye bibabaje.”