Umubyeyi wo mu karere ka Rusizi, mu murenge wa Mururu mu kagari ka Kabahinda, Uwamariya Noella wibarutse avuye kwamamaza Kagame, yise umwana we Irarinda Ange Jeanine.
Uyu mubyeyi wari utwite inda nkuru, yanze gusigara mu rugo atagiye kwamamaza Kagame wiyamamarije i Rusizi ku wa 28 Kamena 2024 hanyuma inda imufata avayo.
Uwamariya Noella wari mu bihumbi by’abaturage bitabiriye iki gikorwa, akiva kuri site yahise afatwa n’ibise hitabazwa imbangukiragutara, imugeza ku bitaro bya Gihundwe ari naho yabyariye umwana w’umukobwa.
Ibi byishimo byahuriranye n’urukundo rudasanzwe akunda Paul Kagame. Umwana we yamwise, Irarinda Ange Jeannine.
Magingo aya umubyeyi n’umwana bameze neza, ndetse bamaze no gusezererwa mu bitaro.
Ati “Nabyaye neza rwose, imbangukiragutabara ikingezayo nahise mbyara. Impamvu namwise Ange nabigiriwemo inama n’abantu baje kunsura ku bitaro, kuko Paul Kagame afite umukobwa witwa Ange”.
Uwamariya abaye umubyeyi wa kabiri ubyaye yitabiriye igikorwa cyo kwamamaza Paul Kagame, nyuma w’umubyeyi w’i Muhanga wabyaye agiye kwamamaza uyu mukandida, akita umwana we Ian Kagame Mwizerwa.
