Igisirikare cya Leta Zunze Ubumwe za Amerika cyatangaje ko nta musirikare cyangwa ibikoresho bisigaye ku birindiro byayo muri Agadez mu gihugu cya Niger. Nk’uko ibitangazamakuru byaho bibitangaza ngo umuhango wo kwimura ibyo bikoresho wabaye kuri uyu wa Mbere, itariki ya 5 Kanama, imbere y’abayobozi b’ibihugu byombi.
Abasirikare 200 ni bo bari basigaye kuri ibi birindiro, aho indege zihagurukiraga zijya gushaka amakuru no gutata mu kirere cya Sahel. Muri Nyakanga, abasirikare 800 bari bamaze kuva mu bindi birindiro byo muri Niamey.
Gusa “itsinda rito ry’Abanyamerika” riracyahari muri Ambasade ya Amerika mu gihe bagikemura ibibazo bisigaye by’ubuyobozi, nk’uko byatangajwe n’umuyobozi mu Gisirikare cya Amerika, adatanze ibisobanuro birambuye ku kazi bafite.
Kugenda kw’Ingabo za Amerika, bije bikurikira icyemezo cy’abasirikare bahiritse ubutegetsi ,muri Werurwe 2024, cyo guhagarika amasezerano ya gisirikare Niger yari yaragiranye na Washington, yashyizweho umukono mu 2012 ku butegetsi bwa Mahamadou Issoufou.
Nyuma yo guhirika ubutegetsi bwa Mohamed Bazoum umwaka ushize, Abanyamerika bagerageje kwakira ubutegetsi bushya buyobowe na Gen. Abdourahamane Tiani, bizeye ko bazakomeza kugira ibirindiro bya gisirikare muri iki gihugu ariko biba iby’ubusa nyuma yo kwemeza ko ayo masezerano ntacyo amariye Niger.
Ikinyamakuru New York Times kivuga ko mu gihe cy’imishyikirano yo gusesa amasezerano, Abanyanijeri bijeje Abanyamerika ko Abarusiya batazemererwa guhita binjira mu birindiro byahoze ari ibyabo, nyamara nyuma yo guhagarika umubano n’abafatanyabikorwa bayo b’iburengerazuba, akanama kayoboye igihugu (CNSP) kegereye u Burusiya, aho RFI ivuga ko mu mezi ashize, Moscou yohereje abarimu ba gisirikare n’ibikoresho ku butaka bwa Niger.
Izindi nkuru wasoma:
- California: Abantu babiri barokotse impanuka y’indege
- Igisubizo cya Riderman ku kwiyamamariza kuzaba umudepite
- Amerika ikomeje kwitambika umugambi wa Iran kuri Israel
