Perezida Samia Suluhu Hassan wa Tanzania yihanganishije imiryango yabuze ababo mu mpanuka y’imodoka yabereye mu Karere ka Karagwe, Intara ya Kagera, ku wa Gatatu tariki ya 4 Ukuboza. Iyi mpanuka yabaye ubwo imodoka eshatu zagonganaga, ikagwamo abantu barindwi, abandi icyenda bagakomereka.
Mu butumwa yanyujije ku rubuga rwa X, Perezida Samia yavuze ko yababajwe cyane n’aya makuru. Yagize ati: “Nakiranye umubabaro amakuru y’impanuka y’imodoka eshatu yabereye mu mudugudu wa Kihanga, akarere ka Karagwe, intara ya Kagera yaguyemo abantu barindwi abandi icyenda bakayikomerekeramo. Nihanganishije imiryango y’ababuze ababo, abavandimwe na Komiseri w’Intara ya Kagera, nyakubahwa Fatma Mwassa.”
Perezida Samia yasoje ubutumwa bwe yifuriza abitabye Imana kuruhukira mu mahoro, anasaba ko abakomeretse bakira vuba. Yashimangiye ko ubuyobozi buri gukora ibishoboka byose ngo impanuka nk’izi zigabanuke.
Yanasabye Polisi gukaza ubugenzuzi bw’imihanda, by’umwihariko mu mpera z’umwaka, asaba ko hashyirwaho ibyapa ahantu hakunze kubera impanuka. Yanashishikarije abagenzi gutanga amakuru ku bapakira batubahiriza amategeko y’umuhanda, kugira ngo bafatwe hakiri kare.
