Kapiteni wa Rayon Sports, Muhire Kevin, yatoranyijwe nk’umukinnyi witwaye neza kurusha abandi (Man of the Match) mu mukino wahuje Rayon Sports na APR FC, warangiye amakipe yombi anganyije ubusa ku busa (0-0).
Nyuma y’umukino, Muhire Kevin yatangaje ko yagize umukino ukomeye kandi akagirwa inama na kapiteni wa APR FC, Niyomugabo Claude bari bahanganye, amubwira ko umunya-Uganda, Taddeo Lwanga ashaka kumuvuna:
“Kapiteni wa APR FC, Niyomugabo Claude, yanyegereye arambwira ati ‘Witonde, ukine neza, Taddeo Lwanga arashaka kukuvuna kandi turagukeneye mu mikino ya CHAN,’” – Muhire Kevin.
Iri jambo ryerekanye ko nubwo umukino wari ugoranye, hari ubufatanye bwagaragajwe hagati y’abakinnyi b’amakipe yombi, nubwo bari bahanganye mu kibuga. Muhire Kevin yashimiwe cyane n’abafana ba Rayon Sports ku bwo kwitwara neza muri uyu mukino ukomeye.
