Ubuyobozi bw’ikipe ya APR FC bwagaragaje ishimwe ryabwo ku bakinnyi nyuma yo kunganya na mukeba Rayon Sports banganya 0-0 mu mukino wa shampiyona wabereye kuri Stade Amahoro ku wa Gatandatu.
Nubwo ubuyobozi bw’iyi kipe bwashimye abakinnyi, abakunzi ba APR FC bo ntibanyuzwe n’umusaruro. Bamwe mu bafana baganiriye n’itangazamakuru bavuze ko biteze intsinzi ku mukino nk’uyu, aho gutsinda kwari ngombwa ngo ikipe igabanye ikinyuranyo cy’amanota.
Mbere y’umukino, APR FC yarushwaga amanota 11 na Rayon Sports, bikaba ngombwa ko itsinda ngo ibe yegerana na yo mbere yo gukina imikino yayo y’ibirarane.
Mu gice cya mbere, amakipe yombi yagiye asimburana mu gusatira izamu. Fall Ngagne wa APR FC yahushije igitego asigaranye na Pavelh Ndzila wa Rayon Sports, mu gihe na Mamadou Sy wa Rayon Sports yahushije uburyo nk’ubwo asigaranye na Khadime Ndiaye.
Mu gice cya kabiri, imbaraga zaragabanutse, ariko Rayon Sports yaje kubona Coup Franc ku munota wa 89, nyuma y’uko Aliou Souane akoreye ikosa hafi y’urubuga rw’amahina. Gusa iyi kipe ntiyabashije kubyaza umusaruro ayo mahirwe.
Nyuma y’umukino, ubuyobozi bwa APR FC bwasuye abakinnyi mu rwambariro bubaha agahimbazamusyi k’ibihumbi 300 Frw, nubwo batashoboye gutsinda uyu mukino.
APR FC kuri ubu iri ku mwanya wa gatanu n’amanota 19, ikaba irushwa amanota 11 na Rayon Sports iri ku mwanya wa mbere. Iracyafite ibirarane bibiri birimo umukino izahuramo na Kiyovu Sports ku wa Gatatu tariki 4 Ukuboza 2024 kuri Kigali Pele Stadium, ndetse n’umukino izakina na Musanze FC mu ntangiriro za Mutarama 2025.
Ni ugutegereza kureba niba APR FC izabasha gukura amanota yose muri iyo mikino kugira ngo yongere kwiyunga ku makipe ahatanira igikombe.
