Iradukunda Elie Tatou, umukinnyi ukina hagati wakiniraga ikipe ya Mukura Victory Sports, wari mu mwaka we wa kabiri muri iyi kipe y’i Huye. Uyu musore w’imyaka 17, uzwiho ubuhanga bwo gufasha abataha izamu, amaze gukurura amaso y’amakipe akomeye ku mugabane w’u Burayi.
Kuva kuri uyu wa Mbere tariki ya 9 Ukuboza, Iradukunda Elie Tatou yatangiye igeragezwa mu ikipe ya Sporting Clube de Braga yo mu Cyiciro cya mbere muri Portugal. Ibi bibaye nyuma y’uko uyu mukinnyi yari amaze iminsi ashyirwaho amaso n’amakipe arimo na KRC Genk yo mu Bubiligi, aho ibiganiro na yo bivugwa ko bigeze kure.
Nta gihindutse, Iradukunda aritezweho kwitwara neza muri iri geragezwa, bikaba byamuha amahirwe yo kwinjira muri shampiyona zikomeye i Burayi. Abakurikiranira hafi umupira w’amaguru mu Rwanda bemeza ko ibi ari amahirwe akomeye ku mukinnyi ndetse no ku mupira nyarwanda muri rusange. Biramutse bikunze, yazerekeza i Burayi akimara kuzuza imyaka 18 y’amavuko.
