Umunyamakuru w’imikino Kazungu Claver, wari umaze ukwezi kumwe akorera Fine FM mu kiganiro Urukiko rw’Ubujurire rwa Siporo, yasezeye bagenzi be ababwira ko guhera ku wa Mbere azatangira imirimo mishya.
Kazungu yari yageze kuri Fine FM nyuma yo kuva kuri RadioTV10 yari amazemo imyaka ine n’igice. Nubwo impamvu z’ihinduranya rye zitaratangazwa ku mugaragaro, amakuru ava ahantu hatandukanye avuga ko ashobora kwerekeza kuri radiyo nshya ya Sam Karenzi, umwe mu bakoranye nawe kuri RadioTV10 na Fine FM.
Mu butumwa yageneye bagenzi be, Kazungu yashimiye ubufatanye bagiranye muri iki gihe gito ndetse anabizeza ko azakomeza gukorana nabo mu bundi buryo mu rwego rwo guteza imbere itangazamakuru ry’imikino mu Rwanda.
Sam Karenzi nawe aherutse gutangaza ko afite gahunda yo gutangiza radiyo ye bwite, bikaba bishimangira amakuru avuga ko Kazungu ashobora kuba ari umwe mu bazaba batangirana nayo. Iyi radiyo nshya iramutse ishinzwe, yaba yongeye kugirira akamaro urwego rw’itangazamakuru ry’imikino mu Rwanda, rukomeje kwaguka umunsi ku wundi.
Abakunzi ba Kazungu Claver baracyategereje kumva amakuru y’ukuri ku murimo mushya agiyemo, ariko abamukurikira basanzwe bemeza ko ahantu hose azajya azakomeza kwitwara neza nk’uko asanzwe amenyerewe.
