Mu bihe bitandukanye twagiye twumva umwuka mubi hagati y’abahanzikazi babiri, Sheebah Karungi na Cindy Sanyu, aho wasangaga buri wese avuga ko ari umwamikazi mu muziki wa Uganda.
Ibi byajyanaga no guterana amagambo ku mbuga nkoranyambaga ndetse ugasanga abafana nabo bakomeza kubitiza umurindi.
Byaje kugera n’aho aba bombi babategurira igitaramo ngo bazahanganiremo bityo uzemeza undi akaba ari we uzajya afatwa nk’umwamikazi, gusa n’ubundi byarangiye rubuze gica.
Ubwo yaganiraga na Kiss Fm mu kiganiro Kiss Drive, Sheebah Karungi yavuze ko nta rwango ruri hagati ya na Cindy ahubwo biriya byose abantu baba babona ni akazi baba barimo kuko bimwinjiriza.
Kuri we avuga ko kuba yavugwa mu makimbirane n’undi muhanzi ariko biri bumwinjirize amafaranga ntacyo byamutwara, ndetse haramutse hateguwe ikindi gitaramo cyo guhangana na Cindy ari bukuremo amafaranga, nta gushidikanya yahita abikora.
Yavuze ko iyo aba afitanye ikibazo na Cindy, ntabwo yari kwitabira igitaramo k’itsinda ‘Blu3’ riherutse gukora ari na ryo Cindy abarizwamo.
Yakomeje avuga ko yashoboraga kutitabira kiriya gitaramo akigira nk’aho nta cyabaye, ariko bitewe n’uko ari umufana wabo kandi akunda indirimbo zabo cyane, yagombaga kujyayo n’ubwo byatunguye benshi.
Sheebah wageze mu Rwanda mu ijoro ryo ku wa gatatu, akaba ategerejwe mu gitaramo kizaba kuri uyu wa gatandatu tariki 17 Kanama 2024, muri Camp Kigali.
