Ku wa Gatandatu ushize kuri ‘stade des Martyrs’ i Kinshasa muri DR-Congo habereye isanganya ubwo umuhanzi ukunzwe n’abatari bake muri icyo gihugu Mike Kalambay mu ndirimbo zahimbiwe Imana yahakoreraga igitaramo ariko benshi bagapfa.
Magingo aya Minisiteri y’Ubutegetsi bw’Igihugu muri Congo iravuga ko abantu icyenda bapfuye abandi 19 bagakomereka bitewe no kubura umwuka muri iyo sitade ijyamo abantu 80,000 bicaye neza kuko ngo abaje muri icyo gitaramo bari benshi cyane.
Iyo Minisiteri kandi, yahise itangaza ko ibikorwa byose bitari ibya siporo bihagaritswe kuri ‘stade des Martyrs’ ndetse no kuri sitade Tata Raphaël nayo ifite ubushobozi bwo kwakira abantu 60,000.
Minisitiri w’Intebe wungirije akaba na Minisitiri w’Ubutegetsi bw’Igihugu n’Umutekano Jacquemain Shabani, yavuze ko mu nama bakoze, bahisemo ko ibikorwa bitari ibya siporo kuri ziriya sitade zombi bihagarara kugera hatanzwe irindi tangazo.
Magingo aya Kalambay w’imyaka 44 ntacyo aratangaza kuri ibi byabaye, ni mu gihe ari umwe mu bakunzwe cyane muri DRC, dore ko akurikirwa n’abarenga 700,000 kuri Instagram, abarenga 600,000 kuri Facebook ndetse n’abarenga 400,000 kuri You Tube.
Isanganya nk’iri muri Kinshasa, ryaherukaga kuba mu 2022 ubwo kuri sidate des Martyrs’ nabwo abantu 11 bapfiraga mu gitaramo cy’umuhanzi Fally Ipupu nawe wo muri Repubulika Iharanira Demokarasi ya Congo.
CLICK HERE TO JOIN UMUBANOTV.COM WHATSAPP BUSINESS GROUP
Izindi nkuru wasoma:
1.Ibanga ryihishe mu kunywa amazi y’indimu
2. Summer time – Amabanga ahishe mu mbuto za watermelon
3.Menya niba ubunyobwa bwongera ubushake mu gutera akabariro
