Niyonzima Olivier wamenyekanye nka Seif yagaragaye mu myitozo ya nyuma Rayon Sports yakoze yitegura umukino ifitanye na APR FC mu wo gusogongera Stade Amahoro nshya.
Ku gicamunsi cyo ku wa Gatanu tariki 14 Kamena 2024 nibwo Gikundiro yakoze imyitozo ya nyuma yitegura mukeba APR FC mu mukino wo gusogongera Stade Amahoro nshya wiswe ‘Umuhoro mu Mahoro’ uteganyijwe ku wa Gatandatu, tariki 15 Kamena 2024 saa Kumi n’Imwe.
Kugaragara mu myitozo kwa Olivier Seif, kwaciye amarenga ko ashobora kuzasubira muri Gikundiro mu gihe ibiganiro byaba bigenze neza.
Niyonzima ni umwe mu bakinnyi Rayon Sports yifuje cyane kuva yayivamo mu 2019. Uyu mukinnyi yaherukaga gutandukana na Kiyovu Sports yakiniye mu mwaka ushize w’imikino.
Olivier Seif ari mu bakinnyi bakundwa cyane n’abafana Rayons cyane ko ubwo iheruka ibihe byiza yari muri iyo kipe ari nabwo iheruka Igikombe cya Shampiyona.
