Nyuma yo kumara igihe kirekire idatsindwa, ikipe ya Patriots BB yatsinzwe na REG BBC, mu mukino wabereye muri Lycee De Kigali.
Kuva Shampiyona y’u Rwanda muri Basketball yatangira, Patriots BBC ntabwo yari yaragatwinzwe umukino n’umwe, kugeza ubwo REG BBC yayikoze mu jisho kuri iki Cyumweru, ikayitsinda amanota 86-83, uba umukino wa mbere itakaje muri Shampiyona ya Basketball 2024.
Haburaga gato ngo Patriots BBC isoze imikino isanzwe idatsinzwe.
Mbere y’uko amakipe ajya muri Playoffs, Patriots BBC isigaje gukina umukino umwe gusa. Ubwo bivuze ko umukino ubanziriza uwa nyuma, ariwo Patriots yatsinzwemo bwa mbere.
REG BBC yatangiye umukino ikubita agatoki ku kandi, ishaka kwica intego ya Patriots BBC yo kurangiza idatsinzwe.
Ibyo byatumye itangira neza umukino ibifashijwemo na Muhoza Jean de Dieu na Cleveland Thomas Jr, ni uko batsinda amanota 27 kuri 20 ya Patriots BBC mu gace ka Mbere.
Mu gace ka Kabiri, nabwo REG BBC yitwaye neza kurenza Patriots BBC, ni uko biyiha amahirwe yo kujya kuruhuka igize amanota 50 kuri 34 ya Patriots BBC
Mu gace ka Gatatu, Patriots ibifashijwemo n’abasore nka Stephaun Branch na Willy Perry, batangiye kugaragaza imbaraga zidasanzwe, gusa kubera imbaraga nyinshi REG BBC yakoresheje mu duce tubiri twa mbere, karangira ikiyoboye n’amanota 67 kuri 61 ya Patriots BBC.
Mu gace ka Kane, REG BBC yongeye kwihagararaho nubwo na Patriots yari iri kwataka bidasanzwe, ni uko umukino urangira yegukanye intsinzi n’amanota 86-83 ya Patriots BBC.
Ibi byaje gutuma REG BBC iba ikipe ya mbere iyitsinze muri Shampiyona y’uyu mwaka
Ni umukino utari ufite icyo uvuze ku rutonde rwa Shampiyona kuko ntacyo wari buhindure, ahubwo amakipe yombi yarwaniraga icyubahiro cyayo.
Iyi mpamvu kandi yatumye uyu mukino utitabirwa cyane nk’uko bisanzwe kuko ubundi usanzwe wuzuza iki kibuga, abantu bakabura aho bicara.
ku wa Gatanu, tariki 23 Kanama 2024, nibwo hazakinwa umukino usoza iyi mikino isanzwe, aho Patriots BBC izakina na UGB BBC
REG BBC niyo yakuyeho intego ya Patriots BBC yo kurangiza Shampiyona idatsinzwe
