Umukino wahuje ikipe ya Rangers International Football Club na Enyimba FC zo muri Nigeria, safubitswe habura iminota micye, nyuma y’imvururu zahabereye.
Byabaye kuri iki cyumweru tariki 9 Kamena 2024 ubwo wari umukino w’umunsi wa 35 muri shampiyona y’ikiciro cya Mbere muri Negeria, aho abafana ibihumbi binjiye mu kibuga bashaka gukubita abasifuzi.
Rangers iyoboye urutonde rw’agateganyo rwa shampiyona naho Enyimba FC ikaba iri ku mwanya wa kabiri aho irushwa amanota abiri.
Uyu mukino wagombaga kugena ukomeza kuyobora urutonde rw’agateganyo rwa shampiyona muri Nigeria dore ko Rangers FC yari iyoboye shampiyona aho yarushaga amanota abiri Enyimba FC ya kabiri.
Ubwo umukino wari wenda kurangira, ugeze ku munota wa 7 w’inyongera, amakipe yombi nta nimwe iratsinda igitego, umusifuzi yahaye Rangers penaliti, ariko abakinnyi ba Enyimba ntibabyemera batangira guteza imvururu bashaka gukubita abasifuzi.
Abafana ba Enyimba nabo bahise bamanuka mu kubuga maze nabo batangira gusagarira abasifuzi batanze penaliti itaravuzweho rumwe.
Ubuyobozi ba NPFL itegura iyi shampiyona ntiburatangaza umwanzuro kuri uyu mukino wahagaritswe mu minota y’inyongera. Bivugwa ko Enyimba ishobora guterwa mpaga cyangwa uyu mukino ukongera gukinwa bundi bushya.
Rangers iyo iramuka itsinze iyi penariti yari gusoza uyu mukino irusha Enyimba amanota atanu, mu gihe shampiyona ibura imikino itatu ngo irangire.
