Rutahizamu w’ikipe y’igihugu Amavubi, Nshuti Innocent, yatandukanye na One Knoxville, ikipe yo mu Cyiciro cya Gatatu muri Leta Zunze Ubumwe za Amerika, nyuma y’amezi 10 gusa ayerekejemo. Ibi byatangajwe n’iyi kipe ibinyujije ku mbuga nkoranyambaga zayo, aho yavuze ko yatandukanye n’abakinnyi umunani barimo n’uyu Munyarwanda.
Nshuti yageze muri One Knoxville muri Gashyantare 2024, nyuma yo gutsinda igeragezwa ryabaye mu Ukuboza 2023. Yari avuye muri APR FC, ikipe imenyerewe cyane mu Rwanda.
Mu mwaka we wa mbere muri US League One, Shampiyona y’Icyiciro cya Gatatu muri Leta Zunze Ubumwe za Amerika, One Knoxville yasoje ku mwanya wa gatanu n’amanota 35, nyuma yo gutsinda imikino icyenda, kunganya umunani, no gutsindwa itanu.
Nshuti yagize ibihe bitandukanye muri iyi kipe, aho rimwe na rimwe yabonaga umwanya wo gukina, ubundi akawubura. Iyi ni inshuro ya kabiri uyu mukinnyi atandukanye n’ikipe yo hanze mu gihe gito, kuko mu 2018 yari yaratandukanye na Stade Tunisien yo mu Cyiciro cya Mbere muri Tunisia nyuma y’amezi make.
Nshuti Innocent amaze iminsi afasha ikipe y’igihugu y’u Rwanda, Amavubi, kandi ari mu bakinnyi bakomeje kwifashishwa mu mikino mpuzamahanga.
