Umunyamerika Jonathan Roumie, uzwi cyane mu gukina filime The Chosen igaragaza ubuzima bwa Yezu Kirisitu, yahishuye byinshi ku rugendo yagiriye mu Rwanda mu mpera za Kanama 2024. Uru rugendo rwibanze ku bikorwa bye byo gufasha, rukanamwongerera ishusho y’umunyamurava mu gukorera neza abakene.
Roumie yageze i Kigali mu ijoro ryo ku itariki ya 28 Kanama 2024. Uru rugendo rwagizwe ibanga, kuko yanze kuvugana n’itangazamakuru. Nyuma y’amezi ane avuye mu Rwanda, yasobanuriye Ibiro Ntaramakuru bya Kiliziya Gatolika (CNA) ko icyari cyamuzanye ari ugusura umwana witwa Emelyne, afasha binyuze mu muryango w’abagiraneza witwa Unbound.
Roumie yavuze ko yahuye na Emelyne bwa mbere muri uru rugendo, kuko yari amaze umwaka umwe amufasha hifashishijwe ikoranabuhanga, yohereza ubutumwa n’amafoto. Ati: “Guhura kwanjye na Emelyne biragoye kubisobanura mu magambo. Ni byiza kubona umuntu wamufashije anyuze mu muryango w’ubugiraneza, ukabona ibyo inkunga yawe yakoze.”
Roumie yavuze ko yatangiye kumva akamaro k’ubugiraneza mu myaka 25 ishize ubwo yasuraga Sénégal bwa mbere, agatangira kubona ubukene buri hirya no hino ku Isi. Muri 2019, yatangiye gufasha abana bakennye anyuze muri Unbound, umuryango washinzwe n’abayoboke ba Kiliziya Gatolika. Uyu muryango ufasha abana kubona ibikenerwa by’ibanze n’amahirwe yo kwiga.
Yagize ati: “Umwana wa mbere nafashije binyuze muri Unbound ni Ibrahim wo muri Tanzania. Naramusuye ubwo nasuraga Afurika, kandi nabonye uburyo inkunga yanjye yahinduye ubuzima bwe.”
Roumie yagaragaje ko gusura abana ahitamo gufasha bimufasha gusobanukirwa byimbitse impinduka ubufasha bwe buzana mu buzima bwabo.
Roumie n’Icyo Gufasha Bisobanuye
Roumie ahamya ko gufasha ari uguhura na Kirisitu binyuze mu bandi. Yagize ati: “Iyo ubayeho ubafasha, uba ubonera Imana mu Isi y’ubukene, mu buzima bw’abandi. By’umwihariko, abakirisitu Gatolika twibukijwe kenshi na Yezu ko tugomba kugira neza.”
Yashimangiye ko afatira urugero ku Mubikira Theresa, wavuze ko ahura na Yezu Kirisitu buri gihe afashije abakene. Ati: “Gufasha abakene si ukubabera umukirisitu gusa, ahubwo ni ukwereka Isi ko ukunda Imana mu bikorwa bifatika.”
Roumie yavuze ko ababyeyi b’aba bana afasha nabo babona impinduka mu buzima bwabo. Amafaranga ashyira muri Unbound afasha aba bana kubona ibikoresho by’ishuri, ibiribwa, n’ibindi bikenerwa by’ibanze. Yavuze ko kubona izi mpinduka bifite imbaraga kandi bimwongerera icyizere cyo gukomeza iki gikorwa cyiza.
Jonathan Roumie yasoje ahamagarira abandi kuba intumwa z’urukundo, cyane cyane mu gufasha abakene, kuko bifasha Isi kugira ubuzima burimo urumuri n’ubwumvikane.
